Ginkumpirmar sang South Korea sang Sabado, Agosto 23, nga nagpalupok ini sang warning shots sa mga tropa sang North Korea sa border sang duha ka pungsod.
Natabo ang insidente sang hapon sang Martes, Agosto 19, sa tunga sang padayon nga pagtukod sang North Korea sang mga barrier halin sang nagligad nga tuig agud permanente nga siraduhan ang ila border sa South Korea.
Ginpahayag sang South Korean joint chief of staff nga ginhimo nila ang tikang matapos nga nagtabok ang mga soldado sang North Korea sa military demarcation line ukon pagmarka sang limitasyon ukon boundaries sa tunga sang duha ka pungsod.
Nag-atras man suno sa iya ang mga suldado sang North Korea matapos nga nagpalupok sila sang warning shots.
Suno sa media sang estado, si North Korean Army Lt. Gen Ko Jong Chol nagsiling nga ang militar sang Seoul naggamit sang mga machine gun sa pagpalupok sang masobra 10 ka warning shots sa ila mga soldado.
Ang pag-publish sang nasambit nga insidente kadungan sang paghalin sang bag-o nga South Korean President Lee Jae Myung gikan sa Seoul kahapon nga adlaw agud magbisita sa Japan kag Amerika.
Madumduman nga natunga ang duha ka Korea umpisa sang Korean War nga natapos sang 1953.
Wala sang peace treaty sa tunga sang duha, gani nagapabilin sila nga naga-inaway bisan pa nga pila na ka tuig halin sang nagbayluhanay sang atake ang North Korea kag South Korea.
