ROXAS CITY – Patay ang siyam ka tuig nga bata matapos masunog ang ila balay sa Barangay Nagba, Cuartero, Capiz.
Ginkilala ang biktima kay Johnny Flores nga nabilin nga nagaisahanon sa balay matapos nga nagpangahoy ang iya lolo.
Suno kay SFO1 Jimmy Openiano sang Cuartero fire station sa pagresponde sang bomberom totally burned na ang balay nga human sa light materials.
Nagaguwa sa inisyal nga imbestigasyon sang Cuartero fire station nga naghalin ang kalayo sa wala napatay nga baga sa dapog.
Nahibaluan nga nabilin nga nagaisahanon ang biktima sa ila balay bangud matapos siya napakaon sang iya lolo, nagpangahoy ini samtang yara naman sa uyapad ang iloy sang biktima sang nagluntad ang insedente.
Nasapwan ang sunog nga lawas sang menor de edad sa ila man mismo hulot.
