ROXAS CITY – Nagtukod sang special investigation team ang Roxas City Police Station agud matutokan ang insidente nga pagluthang-patay sa isa ka negosyante sa Pavia St., Barangay IX, Roxas City.
Ang biktima amo si Rogelio Buaron, residente sang Poblacion Ilawod, Panay, Capiz kag nagpadalagan sang 2019 elections bilang alkalde sang banwa.
Sa interview sang Bombo Radyo kay PLt. Col. Ricardo Jomuad, Jr., hepe sang Roxas City Police Station, iya ginpahayag nga ginatinguhaan na sang kapulisan nga mahatagan sang hustisya ang kamatayon ni Buaron.
Suno kay Jomuad, gina-track na sang mga pulis ang gin-agyan sang mga suspek pinaagi man sa mga nakuha nga footages sang Closed Circuit Television (CCTV) camera.
Nagapabilin nga unidentified ang mga suspek bangud nakasuksok ang mga ini sang bonet sang ginhimo ang krimen.
Pahayag sang hepe, may yara sang ginapatindog nga balay ang biktima sa lugar kun sa diin natabo ang insidente kag samtang nagatindog ini sa kilid sang dalan, gin-untatan ini sang motorsiklo nga sakay ang riding-in-tandem suspects kag ginluthang patalikod ang biktima.
Nahibaluan nga caliber .45 nga armas ang gingamit sa pagluthang-patay kay Buaron.
