Napasakaan na sang kaso nga frustrated murder kag violation sa Republic Act 7610 ukon provides protection for children against physical and psychological abuse ang stepfather nga naglabo sa iya nga manak nga lalaki sa Barangay Matinabos, Sigma, Capiz
Matandaan nga pilason ang isa ka menor de edad matapos ginlabo sang iya stepfather sa Brgy. Matinabus, Sigma, Capiz.
Ang wala na ginhingadlan nga biktima ang nagapang-edaron sang 8-anyos, samtang ang ginapahayag suspek amu ang iya stepfather nga ginkilala kay alyas Jo, 44-anyos kag lunsay mga residente sang nasambit nga lugar.
Sa interview sang Bombo Radyo kay Police Captain Dennis Losbañes, hepe sang Sigma MPS, ginpahayag nga nakainom ang suspek kag samtang nagakatulog ang bata sa sulod sang kwarto sang ila balay, hinali nalang ini ginlabo sang iya stepfather.
Bangud sa natabo nag-angkon sang pilas sa tuo nga porsyon sang ulo ang biktima nga gilayon naman gindala sa Dao District Hospital para sa nagakaigo nga pagbulong.
Samtang, kapigaduhon kag problema sa pamilya ang ginalantaw nga motibo sang kapulisan sa natabo nga insidente.
Nahibaluan nga nagatrabaho sa luwas sang pungsod ang iloy sang bata.
Sa karon, nakahunong na sa karsel sang Sigma PNP ang nasambit nga suspetsado.
