ROXAS CITY, CAPIZ- Nag-gamay ang supply sang dugo sa bug-os nga probinsya sang Capiz, bangud sang asud-asod nga pag-igo sang mga bagyo.
Sa interview sang Bombo Radyo kay Mr. Raymundo Martinez, Administrator sang Philippine Red Cross Capiz Chapter, iya ginpahayag nga madamo sang mga bloodletting activities ang nakansela bangud sang amo nga mga bagyo.
Suno kay Martinez, sa nagahilapit nga Dugong Bombo 2025: “A little pain, a life to gain” sang Bombo Radyo kag Star FM sa Nobyembre 15 sa Capiz State University Main Campus, ginalauman sang ila nga talatapan nga mahatagan sa solusyon ang kakulang sang amo nga supply.
Pahayag nya, madamo sang mga indibidwal ang sa subong nagakinahanglan sang dugo apang indi bastante apisar nga nagpangayo na sila sang bulig sa Manila, kulang sa gihapon.
Hugot nga ginaimbetaran sang natungdan ang publiko nga makigbahin sa Dugong Bombo Blood Letting Activity, ilabi na sa mga qualified blood donors, agud nga madamo sang mga kabuhi pa ang masalbar.
Samtang, ginalauman ni Mr. Martinez nga magadamo ang magadonar sang dugo sa Dugong Bombo kag madamo sang supply ang matipon sang ila nga talatapan.
Interviewed by Bombo Francis Biñas
