ROXAS CITY – Nagapabilin nga atlarge ang 36-anyos nga lalaki nga suspetsado sa pagbuno sa kaupod sini sa ilimnan sa Barangay Agcabugao, Cuartero Capiz.
Ginpahayag ni Police Chief Master Sergeant Arnold Batacandolo, imbestigador sang Cuartero Municipal Police Station nga nagabilin nga atlarge ang suspek nga si Vic Pedrosa matapos nga ginaalegar ginbuno ang biktima nga si Erwin David lunsay mga residente sang nasambit nga mga lugar.
Sandig sa inisyal nga imbestigasyon sang Cuartero PNP nga samtang nagainum-inom ang biktima kaupod sa balay sang suspek nga hinali na lamang nga nag-angkon sang indi pag-intiendihanay.
Ginaalegar nga nagsulod sa kusina ang suspek kag nagkuha sang kutsilyo si Pedrosa sa diin hinali na lamang nga ginbuno sa dughan ang biktima.
Gindala naman sa Dao District Hospital ang biktima apang gintransfer man gilayon sa isa ka pribado nga ospital sa syudad sang Roxas para sa nagakaigo nga pagbulong.
Madasig naman nga nagpalagyo ang suspek matapos ang nasambit nga krimen.
