DUMALAG, CAPIZ – Ginpasakaan na sang kaso ang suspek sa pagpanghatuk-hatok labo sa 36 anyos nga mister sa Barangay Sta. Rita, Dumalag, Capiz.
Nagapangatubang sa kaso nga Murder ang suspek nga ginkilala nga si Rico Fica nga amo ang responsable sa kamatayon sang biktima nga si Michael Fuyonan sang nasambit man nga lugar.
Base sa inisyal nga impormasyon nga nakuha sang Bombo Radyo sa Dumalag Municipal Police Station, gin-ako mismo sang suspek nga siya ang naglabu sa biktima kag wala ini sang iban nga upod.
Nahibaluan pa nga tuman nga naakig ang suspek sa biktima bangud sa sadto anay pagtapungol sa iya.
Mahibaluan nga nag-angkon sang 31 ka mga kasamaran sa ulo, liog kag lawas ang biktima tuga sang pagpanglabu sang suspek nga nagresulta sa iya nga kamatayon.
Una na nga nahibaluan nga ginhaboy sang bato ang balay ni Fuyonan apang pag-guwa sini agud tsekyaron kun sin-o ang naghaboy hinali na lamang siya nga ginpalapitan sang suspek kag ginlabu.
Gilayon nga gindala sa ospital si Fuyonan apang gindeklarar nga dead on arrival sang doktor.
