Suspek sa pagpangawat sa isa ka tyangge, ginpanghatag ang groceries nga gintaban sa mga pigado bangud sa kaluoy

Dalop ang isa ka lalaki matapos nga ginsulod kag ginkawatan sang duha ka beses ang tyangge sa Sitio Baybay, Barangay Andagao, Kalibo, Aklan.

Ginkilala ang suspek kay alyas “Jimboy”, 35-anyos, residente sang nasambit nga lugar.

Suno sa tag-iya, una nga ginsulod sang lalaki ang tyangge sini kahapon, Oktobre 1 sang kaagahon nga kun sa diin nakuha sini ang isa ka ream sang sigarilyo kag pila ka makahulubog nga nga mga ilimnon.

Dugang pa sini, nanotisyar sini pagkaaga, Oktubre 2 nga madamo na ang buhin sang iya nga delata, sabon, kape, asukar kag iban pa nga groceries lakip na ang shavers.

Nagdesisyon ang nasambit nga tag-iya nga i-report sa kapulisan ang insidente apang antes ini nga makalab-ot sa Police Station may pila na ka residente sa lugar ang nagsiling nga nagpanagtag si Jimboy sang groceries kag shavers.

Gilayon man sini nga ginkadtuan si Jimboy kag naabtan nya ini nga naga-inom-inom.

Una naman nga ginpanginwala ni Jimboy ang nakumiter apang sa ulihi nag-ako man ini nga nagkawat ini sa tyangge bangud naluoy ini sa mga pigado nga mga pumuluyo gani, ginpanghatag sini ang mga groceries nga iya nga gintaban.

Sa karon, yara na sa kustudiya sang Kalibo PNP si alyas Jimboy para sa nagakaigo sini nga disposisyon.