Gin-isyu na sang Senado ang warrant of arrest batuk kay suspended Bamban, Tarlac Mayor Alice Leal Guo ukon Guo Hua Ping kag sa pito ka iban pa matapos nga wala ginsapak sang mga ini ang subpoena para sa imbestigasyon natuhoy sa iligal nga operasyon kag mga criminal activities sang Philippine Offshore Gaming Operators ukon POGO sa Tarlac.
Ginmanduan ang Senate Sergeant at Arms sang 24 oras para mapatuman kag iserbe ang arrest order.
Magluwas sa suspendido nga alkalde, gin-isyuhan man sang arrest warrant ang pamilya ni Guo nga sanday Jian Zhong Guo nga amay ni Mayor Alice, Lin Wenyi ang ginapahayag biological mother sang alkalde, kag mga utod sini nga sanday Shiela, Seimen kag Wesley Guo.
Ginpaaraesto man sanday Technology and Livelihood Resource Center Deputy Director General Dennis Cunanan kag Nancy Gamo nga accountant ni Mayor Guo.
Pirmado nanday Senate Committee on Women, Children, Family Relations and Gender Equality Chairperson Risa Hontiveros kag Senate President Francis Chiz Escudero ang mga arrest order.
Ang mga naisyuhan sang warrant of arrest ang iga-detain anay sa Senado tubtob sa mapaatubang ang mga ini sa hearing nga gintalana sa Hulyo 29. Magluwas sa warrant of arrest, nagpaguwa man sang subpoena ang Senado para naman sa iban pa nga resource persons nga una na nga gin-imbitahan sang komite apang napaslawan nga magtambong sa hearing
