ROXAS CITY- Ginhilway na sa karsel ang tanod nga suspek sa pagpangbuno sa isa ka trisikol driver sa binaylehan sa Barangay Angub, Cuartero, Capiz.
Suno sa nakuha nga impormasyon sang Bombo Radyo Roxas sa Cuartero Municipal Police Station, hilway na ang suspek nga si Raul Dequiña, 50-anyos, residente sang nasambit nga lugar matapos nagtakop ang iya reglementary period of detention.
Mahibaluan nga nag-angkon sang pilas sa tiyan kag abaga ang biktima nga si Johnny Cayanan, 47-anyos, residente sang Brgy. Sto. Niño, Dumalag, Capiz matapos ginbuno sang nasambit nga suspek.
Sa interview sang Bombo Radyo kay PCAPT. Alladen Talaban, ginpahayag nga yara sa impluwensya sang makahulubog nga ilimnon ang biktima sang nagpadulong ini sa binaylihan kag sang ginsaway ini sang suspek, wala ini nagpati kag didto na may nagluntad nga indi pag-intindihanay sa tunga sang suspek kag biktima.
Dugang pa ni Talaban, nag-angkon sang pilas sa dughan kag tiyan ang biktima nga madasig naman nga gindala sa Dao District Hospital, apang sang ulihi gin-transfer ini sa Roxas Memorial Provincial Hospital agud ma-operahan.
Sa karon, ginahulat pa sang mga katapo sang Cuartero Municipal Police Station ang iban nga mga dokumento sang biktima agud mapasakaan na sang kaso nga Frustrated Homicide ang amo nga suspetsado.
