LAMBUNAO, ILOILO – Ginkumpirmar ni Lt. Col. Jay Javines, Chief sang 3rd Division Public Affairs Office nga matag-as nga lider sang New People’s Army (NPA) ang tatlo nga napatay sa nagluntad nga engkwentro sadtong Agosto 15, 2024 sa Brgy. Cabatangan, Lambunao, Iloilo.
Sa pagpakig-angut sang Bonbo Radyo kay Lt. Col. Javines, ginpahayag sini nga anay Secretary kag subong Deputy Secretary sang Komiteng Rehiyon-Panay ang isa sa napatay nga si Maria Concepcion Araneta Bocala ukon mas kilala sa tawag nga si “Concha”.
Kaupod ni Concha sa napatay amo ang Secretary sang Central Front nga si Vivian Torato Teodosio ukon mas kilala nga si “Mia/Babes/Mara”.
Suno pa kay Javines, una naman nga nasapwan ang ginbayaan nga patay nga lawas ni Vicente Hinojales nga mas kilala sa tawag nga “Arjie/Hadjie/Mandi/LJ” nga Regional Secretary sang KR-Panay.
Samtang, dako suno diri nga epekto sa rebelde nga grupo ang kamatayon sang nasambit nga mga rebelde bangud makabig ang mga ini nga high-ranking leaders.
Panugyan naman ni Javines sa mga nabilin nga yara sa hublag, mahimo gid sila maka-avail sang peace program sang gobyerno agud indi na magluntad sa engkwentro kag makapangabuhi ang mga ini sang malinong.
