ROXAS CITY – Naghatag sang iya nga paathag ang tenant sang isa ka apartment sa Barangay Tiza, Roxas City kun sa diin nakit-an ang containers sang mga kemikal nga ginaalegar ginagamit sa paghimo sang shabu.
Sa exclusive interview sang Bombo Radyo Roxas kay Racel Dichosa, General Sales Manager sang ROCKSLAB Scientific Supply and Services, ginpahayag sini nga wala sang kamatuoran nga ginagamit sa paghimo sang shabu ang nasambit nga mga kemikal.
Suno sa iya, ang nasambit nga mga kemikal ang ginagamit sang mga nursing students sa ila nga experiments sa pila ka mga eskwelahan sa siyudad sang Roxas kag inug-dispose na ang mga ini.
Ginpahayag ni Dichosa nga iya na lamang nga ginahulat ang permit to travel gikan sa Philippine Drug Enforcement Agency (PDEA) para sa proper disposal sang nasambit nga mga kemikal.
Gindugang pa ni Dichosa nga mismo ang tag-iya sang apartment ang nagpanugyan sa iya nga sa guha sang unit nga iya gina-rentahan ipahamtang ang kinarton sang mga kemikal.
Ginklaro man sini nga wala siya sang plano nga palagyuhan ang tag-iya sang apartment bangud nag-atendir pa ini sa lubong sang iya nga utod.
