BANGLADESH – Mas naga-init pa ang tension sa Bangladesh samtang ginahulat ang mangin pamatbat kay former Prime Minister Sheikh Hasina.
Pila ka mga magagmay nga homemade nga bomba ang nagsigabong sa Dhaka sang Domingo.
Wala man sang may napilasan apang madamo sang tawo ang nakabatyag sang kulba.
Ginalauman nga subong nga adlaw sang Lunes, magahatag sang desisyon ang korte sa kaso batuk kay former Prime Minister Hasina.
Ginpahalin siya sa pwesto sang nagligad nga tuig kag gin-akusaran bangud sa pagmandu sang violent attacks sa mga student protesters sang 2024.
Gindepensahan man sini ang iya kaugalingon kag nagasiling nga inosenti siya kag nagatinir na sa India umpisa nga nagbiya ini sa Bangladesh.
Naka-high alert naman ang mga kapulisan.
Apang base sa mga reports, ginaalegar ginmanduan sang police chief ang mga kapulisan nga mahimo sila nga makatiro sang bisan sin-o man nga madakpan nga nagapangsunog sang pagkabutang ukon nagahaboy sang bomba nga makapatay sang tawo.
Sa subong, tuman ka hugot ang seguridad indi lang sa Dhaka kundi mangin sa Gopalganj, ang lugar ni Hasina kag sa mga malapit nga areas.
May mga dugang naman nga security forces nga nag-augment kaangay sang Border Guard Bangladesh.
Antes pa man ang nangin desisyon sang korte, masobra 30 ka mga crude bombs ang nagsigabong kag madamo sang mga bus ang nasunog sa Dhaka kag iban nga lugar.
Madamo na sang natigayon nga maaresto ang pulis nga lunsay mga supporters sang Partido ni Hasina nga amo ang Amawi League bangud sa ginaalegar pagpalupok ukon pagguba sang mga propedad.
