Labi pa nga naglala ang tensyon sa Middle East matapos naglunsyar ang Iran sang mga missile kag drone batok sa Israel kag Kuwait.
Natabo ini isa ka adlaw matapos nagpaandam si Donald Trump nga may 48-oras ang Iran agud makalab-ot sa isa ka kasugtanan ukon mag-atubang sang mabug-at nga silot.
Suno sa mga opisyal sang Israel kag Kuwait, gilayon nga nagresponde ang ila air defense systems agud ma-intercept ang mga palaabuton nga pag-atake gikan sa Iran.
Ini nga insidente ang kabahin sang nagapadayon nga giyera sa Middle East nga nagsugod masobra isa ka bulan na ang nakaligad, matapos ang tingub nga pag-atake sang US kag Israel batuk sa Iran nga ginsabat sang Tehran paagi sa serye sang mga pag-atake.
Ang mga tensyon naglapta sa bug-os nga rehiyon, kag ang pangkalibutanon nga ekonomiya tuman nga naapektuhan.
Hugot man nga ginabantayan sang Iran ang Strait of Hormuz, isa ka importante nga ruta sang langis kag gas sa kalibutan, kag padayon nga ginapuntariya ang mga pasilidad sa ekonomiya sa mga pungsod nga kaalyado sang US kag Israel.
Sa pihak nga bahin, nagapadayon ang pag-atake sang Israel kag US sa sulod sang Iran. Matandaan nga sang Sabado, lima ka tawo ang napatay matapos nga naigo sang airstrike ang isa ka pasilidad sa petrochemical sa Khuzestan Province.
Padayon nga ginamonitor sang mga otoridad ang sitwasyon samtang nagalala ang tensyon sa rehiyon.
