ROXAS CITY – Nagdepensa ang isa sa duha ka mga driver sang colorum nga tricycle nga ginsakyan sang mga bisita nga nagtambong sa eleksiyon sang Philippine Councilors League (PCL) Capiz Chapter natuhoy sa ginaalegar tuman ka mahal nga plete nga ila ginsukot.
Suno kay Arnel Flores, gin-akuparan siya kag ang kaupod sini nga driver nga si Rogelio Dela Rosa sang tatlo ka mga indibidwal nga nagpanog sa bus terminal sa Barangay Lawaan.
Ginpahayag ni Flores nga madamo sang dala nga kagamitan ang tatlo kalakip diri ang anom ka sako nga may unod nga bayo, tatlo ka karton, lima ka bag, isa ka lamesa kag mga salsalon rason nga gintawag sini si Dela Rosa bangud indi ini masarangan sang isa lamang ka tricycle.
Una suno kay Flores nga ginbilin ang mga bagahe sa tricycle ni Dela Rosa kag nagpaupod sa iya ang duha ka persona agud ma-tsekyar ang venue sa Kapis Mansions sa Barangay Banica.
Halos 15 minutos suno sa iya ang iya paghulat bangud nadugayan ang duha sa pag-tsekyar sang venue antes sila nagbalik naman sa Barangay Lawaan agud dal-on ang mga kagamitan sa venue.
Matapos gindiskarga ang mga kagamitan, diri na kag ginbayaran si Dela Rosa sang 300 pesos apang liwat nga naghinyo ang tatlo nga magasakay kay Flores agud magpangita sang ila matulugan.
Suno kay Flores gin-updan niya sa pagpangita sang matulugan ang tatlo kag pag-abot sa hotel, naghulat naman ini sang kapin 30 minutos bangud nagcheck-in pa ang mga ini.
Kasunod sini nagpadul-ong pa gid sa isa ka kalan-an ang tatlo sa Legaspi Street kag diri na suno kay Flores nagbayad ang mga pasahero sang 400 pesos kag boluntaryo nga gindugangan nila ini sang 100 pesos agud mangin 500 pesos.
Panindugan ni Flores nga wala sila nagpamentaha bangud halos duha ka oras siya nga ginsakyan sang mga pasahero kag maathag suno sa iya nga gin-akuparan siya sang mga ini.
(PHOTO FROM WEB)
