Wala ginpaiway ni US President Donald Trump ang pagpadala sang ila nga mga tropa nga sundalo sa Ukraine para mapatuman ang ano man nga peace deal sa tunga sang Russia kag Ukraine.
Suno sa US President, igamensyunar niya ang nasambit nga paghinun-anon kaupod ang European leaders kalakip na si United Kingdom Prime Minister Keir Starmer.
Suno sa iya, lunsay nga makigbahin ang Europa kag US sa pag-secure para sa post-war peace sa Ukraine.
Pag-abot sa paghatag sang security guarantees para sa Kyiv, ginsiling ni Trump nga madamo sang bulig ang igahatag pag-abot sa seguridad sa ano man nga post-war settlement apang, hugot sini nga ginsiling nga ang Europa ang first line of defense, kalakip sang bulig nagikan sa Amerika.
Sa isa ka press briefing naman sa guha sang White House, ginkumpirma ni Ukrainian President Volodomyr Zelensky nga ginganyat sini nga magbakal sang $90 billion nga mga armas sang US, apisar natalana pa nga himuon pormal ang nasambit nga proposed deal bilang parte sang security guarantees nga ila natalakay ni Trump kaupod ang EU leaders.
Patigayunon na suno sa iya nila ang mga detalye kaangut sa security guarantees sa sulod sang 10 ka adlaw.
Samtang, matapos ang pagsinapol sa tunga nanday Trump kag Zelensky kaupod sang EU leaders, masunod naman nga ginaplanuhan ni Trump ang peace summit sa tunga nanday Zelensky kag Russian President Vladimir Putin, nga pagasundan sang trilateral meeting kaupod ang US.
