PILAR, CAPIZ- Nagpasar ang Sangguniang Panlalawigan sang Capiz sang resolusyon nga nagadeklarar sang nadiskubrehan nga “Tucad Reef” sa Pilar bilang “Protected Marine Sanctuary.”
Sa interview sang Bombo Radyo kay Mr. Ronald Allan F. Cullo, Head sang Capiz Environment and Natural Resources Office (CapENRO), iya ginpahayag nga sa ginpatigayon nga session sa Capiz Provincial Capitol, iya ginpresentar ang importansya sang pagkadiskubre sang reef matapos ang pila ka tuig nga mga pagtuon kag pagbusisi.
Ginsaysay niya nga ang manggaranon nga kadagatan sang lugar nga nadiskubrehan pa sang 1997, pero kinahanglan siguruhon nga ang mga datos sigurado antes ini i-anunsiyo sa publiko.
Ginpasundayag man ni Cullo nga ang pagprotekta sang reef kabahin sang Executive Legislative Agenda ni Gobernador Fredenil Castro. Ang ini nga agenda nagatuyo sa pagpanalipod sang mga natural nga kahimtangan sang probinsya, lakip na ang pagtukod sang tatlo ka “marine protected areas” — ang Tucad Reef sa Pilar, Napti Island nga nagapalibot sa Panay, kag Sapian Bay. Ini nga mga proyekto kabahin sang padayon nga inisyatibo sang administrasyon sa pagpanalipod sang biodiversity.
Nahibaluan nga ang pagkadiskubre sang natural nga kahimtangan sang reef nagduso sa CapENRO nga maghimo sang tikang agud maprotektaran ini.
Bilang sabat, nagduso si Board Member Atty. Paul Ivan Baticados sang mosyon nga magpasar sang resolusyon nga nagadeklarar sang Tucad Reef bilang “Protected Marine Sanctuary,” sa diin ang mosyon gin-aprobahan sang konseho nga may “unanimous votes.”
Ginpahayag man ni Vice Governor Jaime Magbanua nga ang “Tucad Reef” ang bugal sang Capiz, tungod kay ang nadiskubrehan nga kadagatan nagapakita nga may potensyal ang probinsya nga mangin isa ka popular nga diving site sa Pilipinas.
Interviewed by Bombo Francis Biñas
