ROXAS CITY – Ginalauman ang pagtambong sang madamo nga mga deboto sang tuigan nga Pasyon ni Kristo buwas Huwebes Santo Abril 18, 2019 sa banwa sang President Roxas, Capiz.
Suno kay Mr. Gaspar Managuit, direktor sang Pasyon play, preparado na sila para sa nasambit nga event buwas, sa diin ginalauman ang pagsaksi sang madamo nga deboto nga ginahimo na nga panata ang pagsaksi sa Pasyon ni Kristo tagsa ka semana santa.
Ginkabig man ni Managuit nga daku nga paghangkat sa iya bilang direktor ang pagpamuno sa tuigan nga aktibidad nga ginasaksigan indi lamang sang mga deboto nga katoliko nga mga Pilipino kundi kalakip na ang mga turista nga ginakadtuan ang nasambit nga lugar tagsa ka Semana Santa.
Patigayunon ang reenactment sa 1st part sang Pasyon play sa Civic center sang President Roxas tobtob sa Sitio Boac cemetery sa diin himoon ang pagtaltal.
