Lauman ang padayon nga pag-ulan sa Mindanao, Eastern Visayas, kag Palawan sa sulod sang masunod nga 24 oras bangud sa epekto sang Intertropical Convergence Zone (ITCZ), suno sa PAGASA subong nga Domingo sang hapon.
Magal-umon ang kalangitan nga may lapta-lapta nga pag-ulan kag pagpanaguob, nga mahimo tunaan sang flash floods ukon landslides bangud sang kasarangan tubtob mabaskog nga pag-ulan.
Samtang, ang Metro Manila kag nabilin nga parte sang pungsod ang maka-eksperyensya sang medyo magal-umon tubtob magal-umon nga kalangitan nga may panalagsa nga pag-ulan dala sang easterlies.
Apisar nga wala sang low-pressure area nga ginabantayan, nagapaandam ang Pagasa sang tuman nga kainit sa 24 ka mga lugar sa pungsod kun sa diin ginalauman nga magalab-ot sa 42°C tubtob 45°C ang heat index nga ginakabig nga yara sa “danger” level kag mahimo makatuga sang heat cramps, exhaustion, ukon heat stroke.
Lakip sa mga lugar nga apektado sang delikado nga heat index amo ang Aparri, Laoag, Dagupan, Tarlac, Tuguegarao, Baler, Olongapo, Cavite, Daet, Masbate, Catarman, Pasay, kag iban pa.
Ginapahanumdom ang publiko nga pirme mag-inom sang madamo nga tubig, likawan ang mga aktibidad sa guwa sa tion sang udto, kag maghalong sa sobra nga kainit agud malikawan ang pagmasakit.
