Gin-anunsyo ni Ukrainian President Volodymyr Zelensky nga magabiyahe siya sa White House agud makigkita kay US President Donald Trump sa Lunes, Agosto 18.
Ini agud istoryahan ang pagtapos sang inaway sa Ukraine.
Ang natalana nga pagbisita ni Zelensky sa White House ang kasunod sang summit ukon one-on-one meeting nanday Trump kag Russian President Vladimir Putin sa Anchorage, Alaska.
Apisar nga napaslawan si Trump sa pagkuha sang kasugtanan kay Putin nahanungod sa inaway sa Ukraine, ginreport nga nagdesisyon sila nga magtrabaho sa isa ka kasugtanan sa paghidait agud bug-os nga tapuson ang inaway sa tunga sang Russia kag Ukraine kag indi lamang isa ka untat-lupok.
Madumduman nga nangin kontrobersyal ang katapusan nga pagkit-anay nanday Zelensky kag Trump sa Oval Office sang White House sa Washington DC sang Pebrero 28 sini nga tuig matapos nga natapos ang bilateral meeting sa tunga sang duha sa isa ka argumento nga nagresulta sa pagkanselar sang natalana nga pagpirma sang rare earth mineral agreement kag pag-escort pa gwa sa White House si Zelensky.
