Mas ginpa-istrikto pa ang pagpatuman sang mga minimum health protocols kasunod sang narekord nga kaso sang COVID-19 Omicron variant sa United Kingdom (UK).
Sa interview sang Bombo Radyo Roxas kay Bombo International Correspondent Roland Crispo nga tumandok sang Ivisan, Capiz apang naka-base na sa karon sa UK, matapos makabalhag sang mga nagpositibo sa Omicron variant gilayon nga nagpatawag sang Cabinet Office Briefing Rooms meeting si Prime Minister Boris Johnson agud istoryahan ang mga nagakaigo nga pamaagi agud malikawan ang pagdamo sang mga nagapositibo sa nasambit nga variant.
Suno kay Crispo, umpisa Nobyembre 30, kinahanglan nga magpaidalum sa RTPCR ang isa ka biyahero.Apisar negatibo ukon positibo man ang resulta, nagakadapat man ang mga ini nga mag-isolate.
Nakadepende man sa kondisyon sang isa ka indibidwal kun kinahanglan ini nga i-admit sa ospital.
Epektibo man subong nga adlaw, ang liwat nga pagsuksok sang face mask sa mga lugar kapareho sang eskwelahan, department stores, entertainment areas, movie theaters ukon sinehan kag iban pa apisar nga gindula na ini pila na ka bulan ang nakaligad.
Ginpahayag pa ni Crispo nga posible magataas pa ang numero sang mga nagapositibo sa nasambit nga variant.
Apang kun pamangkuton ang UK Health Department, wala pa karon nakit-an sa pagtuon kun ano kaisog ang epekto sang Omicron variant sa lawas sang isa ka tawo.
Sa baylo, nagakabalaka ang mga ini sa madasig nga paglapta sang nasambit nga variant.
Ginalantaw nga posible tatlo tubtob apat pa ka bulan antes madiskubrehan kun ano ka baskog ang virus.
Ginkumpirmar man sini nga ginpaidalum sa lockdown ang mga lugar kun sa diin nagikan ang mga indibidwal nga nagpositibo.
Sa karon, padayon ang ginapatigayon nga contact tracing sang mga otoridad.
