ROXAS CITY – Padayon nga ginabulong sa ospital ang duwa ka biktima nga lakip sa anom ka mga construction worker nga gin-igo sang kilat kahapon nga adlaw, Mayo 21 sa Barangay Dayao, Roxas City.
Matandaan nga dead on arrival sa Roxas Memorial Provincial Hospital si Ronnel Arinque, 21-anyos residente sang Brgy. Barra sang nasambit nga syudad.
Samtang, ginkilala naman ang iban pa nga mga biktima nga sanday Constancio Cabredo Rama, 53-anyos, Segay Dela Cruz Villanueva, 23-anyos lunsay residente sang Brgy. Tanque, Remuel Francisco Anoche, 33-anyos residente sang Brgy. Adlawan, Macmac Deodoco Antojado, 39-anyos residente sang Brgy. Barra, Reynord Espino, 45-anyos residente sang Brgy. Bolo, sa syudad sang Roxas.
Mahibaluan, nga sang nag-ulan nagpanilong ang mga biktima sa trapal nga nahamtang malapit sa ila gina-ubrahan ukon gina-recrapan.
Sandig sa impormasyon nga nakuha sang Bombo Radyo kay Joshua Cabredo kaupod sang mga biktima, ginpahayag sini nga pag-igo sang kilat nagkulob nalang si Arinque kag ini gid ang napuruhan.
Samtang, nag-angkon naman sang kapilasan sanday Reynord Espino kag Constancio Cabredo Rama kun sa diin nagapabilin ini sa nasambit nga ospital.// Sa karun, yara na sa isa ka punerarya sa syudad sang Roxas ang bangkay ni Arinque.
