(UPDATE) Balik-bayan nga mister, ginpasaylo na ang nadakpan nga misis kag kerido
ROXAS CITY- Ginpasaylo na sang balikbayan nga mister ang iya tiayon nga iya nadakpan sa ila balay kaupod ang iya nga kerido.
Suno kay Alyas Boy, gina-ulikdan sini ang iya mga kabataan nga amo ang una maapektuhan kun dalayon nga mabugras ang ila pamilya.
Ginpahayag pa sini nga nakahanda siya nga buligan ang iya nga tiayon nga si Alyas Angel tubtob nga magbag-o agud dalayon nga madula ang iya pagpang-lalaki
Wala man sini malikawan nga basulon ang iya kaugalingon bangud sa pagtrabaho sini sa luwas sang pungsod rasun nga nagluib ang iya nga asawa.
Nahibaluan pa gikan sa iya nga ginpaidalom sa stress debriefing ang iya duha ka mga anak nga menor-de-edad bangud sila ang una nga naapektuhan sang ila mahibaluan nga may yara sang iban nga karelasyon ang ila iloy.
Matandaan nga mismo ang 36-anyos nga mister ang nakadakop sa iya tiayon nga may yara sang kerido kasunod sang iya pagpauli diri sa siyudad gikan sa pungsod Africa.
