UPDATE REPORT | mga kapulisan may ginatan-aw na nga anggulo sa pagpangluthang-patay sa isa ka mister sa brgy Banica

ROXAS CITY – Ginkumpirmar sang chief investigator sang Roxas Component City Police Station nga may gintan-aw na sila nga anggulo sa pagpangluthang-patay sa isa ka mister samtang nagamaneho sang traysikol sa Barangay Banica syudad sang Roxas.

Sa interview sang Bombo Radyo kay PCpt. Marvin Balmes, suno diri posible pagtimalos ang rason kun nga’a nahimo sang mga suspek ang krimen.

Ginpahayag sini, nga ginatudlo nga suspek si Nestor de Andres sa isa ka stabbing incident nga natabo 20-ka tuig na ang nanligad.

Suno kay Balmes, matapos ang insidente sa Luzon na nagtinir si de Andres kag nagbalik sa probinsya sang Capiz sang tuig 2019.

Samtang, nag-execute naman sang affidavit of undertaking ang asawa sang biktima nga indi na sini luyag pa nga magpasaka sang nagakaigo nga panumbongon sa mga suspek kag indi na pagpaidalum sa autopsy examination.

Nagahinyu naman ang asawa sang biktima nga respetuhon ang ila nga nangin desisyon.