ROXAS CITY – (UPDATE) Nakahunong na sa karsel sang Roxas City Police Station ang suspek nga yara sa likod sang pagpangluthang sa 36 anyos nga tricycle driver sa Corner Magallanes-Aguinaldo-Luna Novicio Street, Barangay 1, Roxas City.
Ini ang ginkompirmar ni Police Master Sergeant Ramil Arcangeles, tagpamaba sang Roxas City Police Station sang mainterview sang Bombo Radyo.
Suno kay Arcangeles nga kasunod sang ila pagpangusisa sa mga nakakita sa pagpangluthang sa biktima nga si Benjie Diestro, 36 anyos, sang Barangay Conciencia, banwa sang Panit-an, didto nakompirmar nga ang suspek amo ang anay amo sang biktima nga si Godofredo Hagos alyas Alog sang Sitio Dulunan, Barangay Mongpong, Roxas City.
Sang ginpadulungan sang mga kapulisan ang ginahamtanga sang suspek, matawhay man ini nga nag-upod sa mga otoridad kag gin-aku nga kahimuan sini ang pagpangluthang sa biktima.
Suno kay Arcangeles nga gintuad sang suspek nga sadtong tuig 2016 nagtrabaho sa iya bilang driver ang biktima kag nag-utang ini sang kapin 5, 000.
Ginpahayag pa sang suspek nga napuno na ini sa pagsukot sa biktima bangud sa tagsa ka magsukot ini, kasubong nga ang biktima pa ang naakig sa iya.
Bangud diri ginapahayag nga ginsundan sang suspek ang biktima kag didto ginluthang sang makatatlo ka beses kun sa diin naigu ang biktima sa iya nga kamot kag tiil.
Suno naman kay Aileen Diestro, asawa sang biktima, desidido sila nga pasakaan sang panumbungon ang suspek.
Suno pa diri nga ginaamat-amatan man sang iya bana sang bayad ang iya nga utang sa suspek gani wala ini maglaom nga mahimo nga luthangon sang suspek ang iya nga bana.
