Ginkasuhan sang Amerika ang bag-o nga Hamas leader nga si Yahya Sinwar kag iban pa nga prominente nga personalidad sang grupo natuhoy sa deadly attack sa Israel sang Oktubre 7 sang tinalikdan nga tuig nga nagpatay sa kapin 1,200 ka mga indibidwal.
Suno sa US Justice department, na-indict ang 6 nga miyembro sang Hamas sa 7 ka numero sang criminal complaint kalakip ang pagpatay sa pumuluyo sang US, conspiracy to finance terrorism kag use of weapons of mass destruction.
Sa criminal complaint, ara ang pila ka dekada suno diri nga mga pag-atake sang Hamas subong man ang sorpresa nga pag-atake sa southern Israel, isa ka tuig na ang nakaligad.
Ini naman ang una nga tikang sang US law enforcement agud mapanabat ang mga ringleaders sang October 7 attack bisan pa 3 sa mga ginhingadlan sa indictment ang patay na kag ang bag-o nga Hamas leader ang ginapatihan nga nagapanago sa mga tunnel sa idalom sang Gaza.
Ang iban nga Hamas leaders nga ginkasuhan ang nagtaliwan nga si anay Hamas leader Ismail Haniyeh, Hamas’ Armed wing deputy leader nga si Marwan Issa, Khaled Mashaal nga nagpanguna sa grupo sa guwa sang Gaza kag West Bank kaupod man sanday Mohammed Deif kag Ali Baraka.
Sanday Haniyeh, Issa kag Deif ang nabalit nga napatay sa nakaligad nga mga bulan sa pag-atake nga ginabasol sa Israel. Kun ma-convict na ang nasambit nga mga miyembro sang Hamas kalakip ang lider nga si Sinwar, magapangatubang ang grupo sa habambuhay nga pagkapreso ukon death sentence.
