Wala pa sang nakit-an nga rason ang mga opisyal sang Estados Unidos agud untaton ang operasyon sang Boeing 787 matapos ang makahalangusbo nga pagtibusok sang eroplano nga Air India nga nagpatay sa masobra 240 ka tawo.
Ginpahayag nanday US Transportation Secretary Sean Duffy kag Acting Federal Aviation Administration (FAA) Administrator Chris Rocheleau nga wala pa sila sang nabaton nga impormasyon angut sa isyu sa kaluwasan nga magaresulta sa grounding sang Boeing 787 aircraft.
Suno kay Duffy, nakalantaw na sila sang mga video kaangut sa insidente kag nakaistorya niya na si National Transportation Safety Board (NTSB) Chair Jennifer Homendy.
Gin-anunsiyo man sini nga magapadala ang US sang isa ka gintingub nga grupo halin sa NTSB kag FAA, nga suportado sang Boeing kag GE Aerospace — ang naghimo sang makina sang nasambit nga eroplano — padulong sa India agud magpatigayon sang mas madalom nga imbestigasyon.
Pahayag naman ni Rocheleau, kun sa imbestigasyon may magguwa nga impormasyon angut sa posible nga katalagman, gilayon sila nga maghulag agud aksyunan ini.
Ginhtagan pagtamod ni Duffy nga indi magduha-duha ang gobyerno sang Estados Unidos nga ipatuman ang anuman nga rekomendasyon para sa kaluwasan sa labing madali nga panahon.
