ROXAS CITY – Igapahamtang sa guwa sang Teodoro Arcenas Trade Center (TATC) ang mga vegetable vendors nagikan sa sulod sang amu nga merkado.
Ini ang ginkumpirmar ni Mrs. Heloise Mendoza, administrador sang nasambit nga merkado, sang mainterview sang Bombo Radyo.
Suno diri, indi pa ini makahatag sang eksakto nga bulan kun san-o pagasuguran ang pag-transfer sa mga vendors, bangud pagaunahon nga ipa-ubra ang dalan kag ang atup antes ang pag-renovate sang vegetable section.
Aminado man ini nga dako nga lugar ang kinahanglanon para sa pagpahamtang sa mga vendor, apang ginpasiguro sini nga mapangitaan sang paagi agud maakomodar kag makabaligya ang tanan.
Nagapangayo man ini sang pag-intindi kag kooperasyon sa tion nga pagasuguran na ang nasambit nga proyekto sang lokal nga gobyerno sang syudad.
