Ginganyat ni Vice President Sara Duterte si President Ferdinand Marcos Jr. nga magpaidalum sa drug test matapos ang pagbuyagyag nga ginhimo ni Senador Imee Marcos nga nagagamit sang iligal nga druga ang First Family.
Sa isa ka interview kay Vice President Sara, ginpahayag sini nga dapat ipakita sang Presidente ang resulta agud mapamatud-an nga masarangan niya pa nga pangunahan ang pungsod.
Sang ginpamangkot siya kun nagapati siya sa alegasyon, ginpahayag sang Bise Presidente nga tanan nga ila kaupod sa party ang nagsiling nga nagagamit sila sang droga.
Sa pihak nga bahin, una nga ginklaro sang Palasyo nga negatibo ang resulta sang drug test ni President Marcos kag wala ini sang tuyo nga magpaidalom sa hair follicle test.
Kaangot sini, wala naghatag sang komento si Vice President Sara sa posibilidad nga mabuslan ang Presidente kun mapahalin sa pwesto bangud suno sa iya, magalala pa gid ang sitwasyon.
Samtang, natalana naman nga magtambong si Duterte sa Senate Hearing sa Huwebes, Nobyembre 27, para sa 2026 budget sang Office of the Vice President.
