Liwat nga nag-init ang paghinun-anon sa House Committee on Justice, matapos liwat nga ginpagwa ang kontrobersyal nga video ni Vice President Sara Duterte sa diin gin-alegar nga ginpahog sini ang kabuhi nanday Presidente Ferdinand Marcos Jr., First Lady Liza Araneta-Marcos, kag anay House Speaker Martin Romualdez.
Ang nasambit nga video ang nangin sentro sang hearing kahapon nga adlaw agud usisaon ang mga alegasyon sang pagpamahog nga kabahin sang gina-atubang nga impeachment complaint ni VP Sara.
Nagtambong man bilang resource persons ang mga tiglawas gikan sa National Bureau of Investigation (NBI) agud maghatag sang impormasyon angut sa ginhimo nga analysis sa nasambit nga pahayag ni Duterte.
Matapos nga gin-play ang video, ginkumpirma sang NBI nga authenticated kag wala gin-edit ukon gin-spliced ang video sang gin-alegar pamahog ni Duterte nga patyon si Presidente Marcos.
Sa hearing, ginpanindugan sang mga opisyal sang NBI nga sakop sang pamahog sang bise presidente ang inciting to sedition kag grave threat.
Ginpagwa man ang pila ka iban pa nga authenticated videos ni VP Duterte kun sa diin ginpahayag sini nga iya gina-imagine ang pag-utod sang ulo ni President Marcos nga suno sa iya indi kabalo magtindog bilang presidente.
