Nagpabutyag si Vice President Sara Duterte sang paghiliusa para sa subong nga bulan nga pagsaulog sang National Women’s Month.
Sa iya pahayag, iya ginkilala ang kabakod sang mga kababainhan nga madinalag-on nga nagdaug sa tagsa ka pagtilaw sang nagligad nga mga krisis.
Suno sa iya, ang mga kababainhan nagasimbolo sang mabaskog nga suporta sang pungsod bilang mga suga sang puluy-an nga nagabugtaw man gilayon pagkatapos sang mga kagamo kag iban pa.
Kasunod sini, nagpanawagan man kag naghingyo si Sara sa publiko nga magkooperar sa pagpasanyog sang mas mabaskog nga suporta para sa mga kababainhan nga sakop sang informal sector kag iban pa nga sektor sang katilingban.
Suno sa iya, ang mga kababainhan nagakinahanglan sang proteksyon para sa mga bahin sang informal sector, climate-resilient support para sa mga lokal nga mangunguma kag pagbukas sang financing access para sa mga kababainhan nga negosyante.
Kasunod sini, ginpahayag man sang Bise Presidente nga ang pagsuporta sa mga kababainhan indi lamang isa ka pagpakita sang maayo nga kabubut-on kundi isa man ka estratehiya para sa pagpasanyog sang inclusivity growth sa sulod sang pungsod.
Sa katapusan, ginhingyo man sang Bise Presidente ang publiko nga iduso ang palaabuton sa diin ang tagsa ka babaye nga Pilipino ginahatagan sang oportunidad nga mangin lider kag may bastante nga oportunidad kag indi lamang puro responsibilidad.
