Indi magnubo sa walo ang napatay bangud sang mabaskog nga ulan nga dala sang shear lines sa Davao Region, suno sa report sang Office of Civil Defense (OCD).
Sa isa ka interview kay OCD Region XI Director Ednar Dayanghirang, iya ginpahayag nga apat sa mga napatay ang nagikan sa Davao de Oro, samtang ang nabilin ang narecord sa Davao Oriental.
Ang tanan nga napatay bangud sa landslides kasunod sang mabaskog nga ulan.
Kaangot sini, ginabulubanta nga halos 20,000 ka pamilya ang apektado sang malain nga panahon sa Davao de Oro lamang kag naglab-ot na sa P376 million ang agricultural damage sa probinsya.
Ginhatagan pagtamod ni Dayanghirang ang kinahanglanon nga kay-uhon ang drainage system sa mga mayor nga dalan agud malikawan ang pagbaha.
Pahayag pa niya, indi maayo ang drainage sa national road, indi kumpleto, gani wala sang nagakaigo nga alagyan ang tubig nga nagailig halin sa kabukiran.
