Gin-imbestigaran karon sang Roxas City Police Station ang isa ka gin-alegar nga insidente sang pagpangawat sa Purok 1, Barangay Libas, Roxas City, Capiz .
Ang biktima amo si alyas Letecia, 85 anyos kag residente sang Barangay Dayao, Roxas City.
Ginkilala naman ang suspek nga si alyas Junjun, kag residente sang Barangay Libas, Roxas City.
Sandig sa imbestigasyon sang Roxas City Police Station, ginsulod sang suspek ang balay sang biktima paagi sa main gate kag nagsulod sa wala nakalock nga front door.
Pagkasulod, nakuiha sang suspek ang isa ka ampao ukon pula nga envelope nga naga-unod sang ₱20,000 nga cash nga yara sa sulod sang prosperity bowl.
Pagkatapos sang pagpangawat, gilayon nga nagpalagyo ang suspek sa wala pa mahibalu-an nga direksyon.
Nakita mismo sang biktima ang natabo nga insidente.
Sa subong, nagapatigayon sang hot pursuit operation ang kapulisan agud madakpan ang suspek, samtang ginahanda man sang imbestigador ang nagakaigo nga dokumento para sa pagpasaka sang kaso batok sa iya.
