ROXAS CITY – Isa patay, isa pilason sa aksidente nga nagluntad sa Barangay Bailan, Pontevedra, Capiz.
Sa inisyal nga impormasyon nga nakuha sang news team sang Bombo Radyo, ginkilala ang napatay nga si Peter Diaz, 36 anyos sang Sitio Banta-aw, Barangay Cogon, Panit-an.
Padayon naman nga ginabulong sa Roxas Memorial Provincial Hospital ang kaangkas ni Diaz nga si Jonathan Bala, 37 anyos sang Barangay Sublangon, Pontevedra matapos mag angkon sang pilas sa magkatuhay nga bahin sang lawas.
Mahibaluan nga sakay sa motorsiklo ang mga ini sang matabo ang aksidente sa Barangay Bailan.
Suno kay Police Corporal Gerald Dellomos sang Pontevedra PNP, ginapahayag nga nagpang-agaw sang linya ang motorsiklo nga ginamaneho ni Diaz rason nga nabungguan ini sang owner-type jeep nga salakyan.
Nagapadayon pa sa karun ang imbestigasyon sang Pontevedra Municipal Police Station sa nasambit nga insidente.
