ROXAS CITY – Patay ang isa ka lalaki matapos nalumos sa isa ka suba sa Barangay New Guia, Maayon, Capiz.
Ginkilala ang biktima kay Jerry Bujano, tumandok sang Negros Occidental apang temporaryo nga nagapuyo sa amo nga lugar.
Sa interview sang Bombo Radyo kay Punong Barangay Liwayway Balponggo, may nakakita pa nga tigulang sa nasambit nga biktima nga nagasakay sa lantay kag magatabok kuntani sa suba apang nadulaan ini sang balanse sa iya pagbugsay sa lantay kag natulasbong.
Nahibaluan nga nakabutwa pa ang biktima samtang nagasinggitan kag nagapangayo sang bulig ang nakakita nga tigulang apang sang ulihi, wala na ini nakit-an pa.
Naglab-ot pa sa pila ka mga inoras antes narekober ang bangkay sang biktima sa ginpatigayon nga search and rescue operation sang mga otoridad.
