PONTEVEDRA, CAPIZ- Dead on arrival ang isa ka senior citizen nga lalaki matapos ginapahayag nabungguan sang nagasunod nga motorsiklo ang ginamaneho sini nga tricycle sa Barangay Rizal, Pontevedra Capiz.
Ang biktima nga ginbawian sang kabuhi amo si alyas “Tonio”, kag residente sang nasambit nga lugar. Samtang ang driver sang motorsiklo, amo si alyas “Toto”, isa ka estudyante kag residente sang banwa sang Pilar.
Sa interview sang Bombo Radyo kay Police Captain Garry Diaz, Hepe sang Pontevedra Municipal Police Station, iya ginpahayag nga sa tion sang natabo ang amo nga insidente, nagikan sa eskwelahan ang biktima nga nagdul-ong sa mga apo sini kag sa pagpauli sini, magaliko kuntani ini padulong sa housing apang nabungguan ini sang nagasunod nga motorsiklo nga ginamaneho man sang nasambit nga estudyante.
Bangud sa makusog nga impact, nagtabog ang senior citizen nagikan sa ginamaneho sini nga tricycle nga gintunaan sang pag-angkon sang patal nga pilas sa ulo.
Samtang ang driver naman sang motorsiklo nag-angkon sang pilas sa magkatuhay nga parte sang lawas.
Gilayon man nga nagresponde sa lugar ang emergency response team agud padapatan sang pauna nga pagbulong ang magkatuhay nga bahin antes ginpadangat sa seperado nga ospital para sa nagakaigo nga pagbulong apang gindeklarar nga dead on arrival ang amo nga senior citizen.
Sa karon, yara na sa kustodiya sang Pontevedra Municipal Police Station ang mga naulamid nga behikulo samtang ginahulat nga makahinun-anon ang pamilya sang magtimabang nga bahin para sa disposisyon sang amo nga insidente.
With a report from Bombo Sunnie Mae Constantino Batencila
