ROXAS CITY – Patay ang driver sang tricycle samtang pilason ang tatlo ka mga pasahero sini matapos nga nagbungguanay ini kag ang isa ka Toyota Revo nga salakyan sa Barangay Dinginan,Roxas City.
Ginkilala ang biktima nga Cirjun Buñi 57-anyos sang Barangay Sibaguan, Roxas City nga nag-angkon sang patal nga pilas sa ulo.
Pilason nga ginpadangat sa ospital para madapatan sang nagakaigo nga pagbulong ang mga pasahero sini nga sanday Noel Acutillar sang Pob Sur, Ivisan; mag-utod nga sanday Reynaldo kag Carlito Amosig, residente sang Barangay Sibaguan.
Sa inisyal nga imbestigasyon sang kapulisan nagaguwa nga madasig ang pagpadalagan sang driver sang Toyota Revo nga si Hernan Rafael Juson 25-anyos sang Sityo Ilaya, Barangay Sibaguan, Roxas City, bangud ginahingagaw sini nga madala sa ospital ang iloy nga si Yolanda Juson nga may ginasuprer nga balatian.
Apang sa wala ginalauman nagsalpukanay sila sang tricycle ni Buñi sa Barangay Dinginan, sining syudad.
Padayon sa karon ang imbestigasyon sang Roxas City PNP sa nagluntad nga insedente.
