TAYTAY, RIZAL – Na-capture sang CCTV sa Taytay, Rizal ang pagpangbuno sang 18-anyos nga babaye sa 10-anyos nga bata nga lalaki.
Suno sa report, nag-angkon sang 22 ka buno ang biktima.
Makit-an sa kuha sang CCTV nga nagatambay ang babaye sa Adhika Street sa Barangay Dolores, Taytay alas 11:00 sang aga sang Lunes, Agosto 19 kag may uyat ini nga patalom.
Samtang makaligad ang pila ka minutos, naglakat-lakat ang babaye kag nagpungko sa likod sang naka-park nga tricycle antes nagbalik sa ginapungkuan sa kilid sang karsada.
Sang nag-agi kag nakalampuwas na sa iya ang 10-anyos nga biktima, hinali niya nalang ini gin-ayad ka buno patalikod.
Matapos ang pagpangbuno, nagtindog kag naglakat ang babaye kag gintudlo sa mga tawo nga nakakita ang nagakayaon nga biktima.
Gilayon naman nga nagdalagan ang iloy sang biktima padulong sa duguon sini nga bata kag ginsakwat agud madala sa ospital.
Suno sa kapulisan, 22 ka buno ang naangkon sang biktima kag milagro nga nakaluwas ini kag nagapaayo sa karon sa isa ka ospital sa Taytay, Rizal.
Nahibaluan nga papauli halin sa eskwelahan ang bata nga biktima sang natabo ang krimen.
Gin-aresto naman sang mga otoridad ang suspek nga ginapahayag indi maistorya sang insakto.
Ginalantaw nga motibo sang kapulisan amo ang pagpangimon bangud timprano pa nadulaan sang ginikanan ang suspek.
Sa karon naka-detain sa custodial facility sang Taytay Police Station ang suspek nga nagapangatubang sang kaso nga frustrated murder.
