Nagapabilin pa sa Tropical Cyclone Wind Signal No. 1 ang 10 pa ka mga kabanwahanan sa Capiz bangud sa Bagyo Tino.
Ini sandig sa ginpaguha nga 5:00 AM weather forecast sang Philippine Atmospheric, Geophysical and Astronomical Services Administration (PAGASA).
Ginakalakipan ini sang mga kabanwahanan sang Sapi-An, Tapaz, Ivisan, Cuartero, Dumalag, Sigma, Dao, Mambusao, Jamindan, kag Dumarao.
Sa subong, padayon ini nga nagadala sang pagpamahog sa Northern Palawan.
Ang sentro sang mata sang Bagyo Tino ang ginabanta yara sa coastal waters sang Linapacan, Palawan.
Dala sini ang kabaskugon sang hangin nga nagadangat sa 120 km/h malapit sa sentro kag pagmadlos nga tubtob sa 165 km/h.
Nagahulag ini West northwestward sa kadasigon nga 15 km/h.
Matapos mag-landfall sa Batas Island, Linapacan, Palawan, ang Bagyo Tino ang padayon nga magahulag sa northern Palawan tubtob sa West Philippine Sea subong nga aga.
Magwa naman ini sa Philippine Area of Responsibility subong nga gab-i (November 5) ukon sa Huwebes sang kaagahon (November 6).
