ROXAS CITY – Preparado na ang 471 ka mga eskwelahan sa probinsya nga pagagamiton bilang voting precinct, kag ang linibo nga mga manunudlo nga magaserbe sa nagahilapit nga eleksyon sa Mayo 9, sini nga tuig.
Ini ang ginpahayag ni Dr. Salvador Ochavo, Jr., Capiz Schools Division Superintendent sang mainterview sang Bombo Radyo.
Sa nasambit nga numero sang mga eskwelahan, isa diri ang secondary school nga may voting precinct, amu ang Capiz National High School, kag ang mga nabilin ang lunsay mga elementary schools na.
Indi man tanan nga miyembro sang election committee ang manunudlo, kundi ginakabug-osan ini sang mga nagkalain-lain nga ahensya sang gobyerno.
Samtang, Commission on Elections (Comelec) na ang nakahibalo kun pila ang mabaton nga honoraria sang mga magaserbe nga manunudlo antes kag pagkatapos sang eleksyon.
Sa karon nga eleksyon, ginpahayag man ni Ochavo nga may special feature ang Comelec, kun sa diin ang mga indi na katakod nga senior citizens nga indi na masarangan magpadulong sa mga voting precinct ang pasugtan nga makaboto sa guwa sang ila presinto apang natumod na ang mga ini sang ahensya.
