ROXAS CITY -Yara na sa 15 ka mga barangay officials ang gina imbestigaran sang Capiz Police Provincial Office (CPPO) nga ginreklamo sa mga kapulisan nga gina-alegar may yara sang kahilabtanan sa anomalya sa distribusyon sang Social Amelioration Program (SAP).
Ini ang ginapahayag ni CPPO Provincial Director Julio Gustilo Jr. sang mainterview sang Bombo Radyo.
Ginpabutyag ni Gustilo nga may yara sang pornal nga reklamo nga ginlab-ut sa CPPO batuk sa 15 ka mga barangay officials nga pirmado sang mga complainant.
Gin-athag ni Gustilo nga indi mapasakaan sang panumbongon ang isa ka barangay officials nga ginareklamo, kung wala sang magatindog nga complainant.
Bangud sini, ginganyat ni Gustilo ang publiko nga tindugan ang mga ginapalab-ut nga reklamo batuk sa mga barangay officials.
Gindugang pa sini nga mahimo gid lamang nga maimbestigahan sang mga kapulisan ang ginapalab-ut nga reklamo sang mga complainant nga wala nagapakilala, apang gin-athag nga indi ini mahatagan sang nakaigo nga hustisya.
Samtang ginkompimar man ni Gustilo nga magluwas sa mga kapulisan sang CPPO, may yara man sang mga reklamo nga ginpalab-ut sa talatapan sang Criminal Investigation and Detection Group (CIDG).
Sa karun indi pa mabuyagyag sang CPPO ang mga pangalan sang mga barangay officials nga gina imbestigaran sang mga kapulisan.
