Gin-aresto sang mga otoridad ang 46-anyos nga amay matapos ginhimuslan sini ang iya 16-anyos nga anak sa sulod sang lima ka tuig sa San Jose Del Monte (SJDM) City, Bulacan.
Ginkilala ang suspek nga si alyas “Lester”, samtang ang biktima ang gintago sa pangalan nga Mina, 16-anyos, Grade 10 student, lunsay mga residente sang Brgy. Gaya-Gaya sa nasambit nga lugar.
Sa report sang pulisya, natabo ang ulihi nga insidente sang pagpanghimulos alas-10:00 sang gab-i sadtong Oktubre 11 sa ila mismo kaugalingon nga balay.
Base sa imbestigasyon sang kapulisan, sa kada mabilin nga isahanon ang biktima sa ila nga balay, ginapwersa ini nga himuslan sang iya kaugalingon nga amay.
Naglab-ot nga indi na maagwanta sang biktima ang kababuyan nga ginahimo sang amay rason nga nag-report na ini sa iya 61-anyos nga iloy.
Ginapahayag nga halin pa sang 2019 tubtob Oktubre 11 sini nga tuig, liwat-liwat nga ginaabuso sekswal sang suspek ang biktima.
Bangud sini, alas-5:30 sang hapon sang Nobyembre 5 nag-report ang mag-iloy sa pulisya nga gilayon naman nagresponde sa lugar kag gindakop ang suspek.
Nagapangatubang ang suspek sa kaso nga paglapas sa RA 11648 kag Acts of Lasciviousness in related to RA 7610.
