Naantala ang ceasefire deal sa Gaza, bangud sa kinalain sang mga posisyon sang mga partido nahanungod sa kadakuon sang pag-atras sang mga pwersa sang Israel gikan sa Palestinian enclave.
Suno sa mga report halin sa Palestine kag Israel, nagpadayon ang indi direkta nga negosasyon sa 60 ka adlaw nga ceasefire nga ginduso sang Estados Unidos sang Sabado.
Samtang si Presidente Donald Trump sang Estados Unidos nagalaum sang madasig nga pag-uswag sa negosasyon.
Apang suno sa pila ka mga sources, isa ka mass-shooting ang natabo sa diin ang mga medics sa Gaza nagreport nga 17 ka tawo ang napatay sang Sabado matapos nga ginaalegar gintiro sang mga tropa sang Israel samtang nagabaton sang ayuda.
Suno sa mga nakasaksi, may mga tawo nga gintiro sa ulo kag lawas, nga ginkumpirmar sang isa ka Reuters reporter nga nagsiling nga nakita nila ang mga bangkay sang mga biktima nga naputos sang puti nga shroud samtang nagahilibion ang mga himata sa Nasser Hospital.
Gin-ako sang militar sang Israel ang insidente apang nagpanindugan nga nagpalupok lang sila sang warning shots, kag suno sa ila wala sila sang nakita nga may naigo.
Nahibaluan nga ang mga delegasyon gikan sa Israel kag Hamas nagabulig sa mga paghambalanay sa Doha, Qatar, nga nagatuyo sa pag-areglo para sa amat-amat nga paghilway sang mga bihag, pag-atras sang mga tropa sang Israel, kag paghinun-anon sang posible nga pagtapos sang inaway.
Linibo naman ka mga Israelis ang nagtipon sa Tel Aviv agud ipabutyag ang ila handum nga makig-negosyar sa paghilway sa nabilin nga mga bihag kag tapuson ang maduguon nga inaway.
