PONTEVEDRA, CAPIZ – Pilason ang 18-anyos nga lalaki matapos ginapahayag gintiro sang amay sang iya ginapangaluyagan sa Barangay Rizal, Pontevedra, Capiz.
Ang biktima amo si alyas Toto, isa ka criminology student samtang ang suspek amo si alyas Bong kag lunsay mga residente sang nasambit nga lugar.
Sa interview sang Bombo Radyo kay PMAJ Greg Anthony Salbang, iya ginpahayag may riding in tandem nga nagpundo sa coffee shop nga ginaubrahan ni alyas Toto kag ginapangita ini kag hinali nalang nga gintiro sang backrider ang biktima.
Bangud sa pagpangtiro, nag-angkon sang pilas sa nagkalain-lain nga parte sang lawas ang biktima nga gilayon gindala sa ospital kag yara na karon sa istable nga kondisyon.
Madasig naman nga nagpalagyo ang suspek nga na-identify sang biktima.
Narekober naman sa ginluntaran sang insidente ang lima ka empty shells sang caliber 45.
Suno kay PMAJ Salbang, base sa ila imbestigasyon, madugay na nga ginapaandaman sang suspek ang biktima bangud nagapangaluyag ini sa iya anak.
Nagapadayon naman ang hot pursuit operation sang kapulisan batuk sa suspek.
– With a report from Bombo Jessa Mae De Los Santos
