ROXAS CITY -Hugot nga ginpanginwala sang 19-anyos nga soltero nga ginkawat sini ang motorsiklo kag ginpanindugan nga ginbarter gid lamang ini sa social media sang wala matumod nga persona.
Ini ang ginpahayag ni Justine Brillo sang mainterview sang Bombo Radyo.
Ginpahayag ni Brillo nga tuman ang kakibot sini sang ginpadulongan sang mga kapulisan sa ila nga panimalay kag ginabawi ang motorsiklo nga ginapahayag nga kinawatan.
Sandig sa panayasayon ni Brillo, nagpost ini sa social media nga nagapangita sang motorsiklo nga mahimo butangan sang sidecar.
Nagpadala sang mensahe suno sa iya ang wala matumod nga suspetsado nga nagtanyag sang motorsiklo sa presyo nga P10,000 apang nagpamalibad si Brillo bangud tuman ka mahal ang ginatanyag nga presyo sang suspetsado.
Gindugang pa ni Brillo, nga nagkasugot sila sang nasambit nga suspetsado nga magbayluhanay na lamang sang ila mga motorsiklo.
Apang ginkadismaya sini sang nahibaluan nga kinawatan ang nabaton sini nga motorsiklo gikan sa barter.
Gintuyo pa ni Brillo nga magpadala sang mensahe sa Facebook apang ginblock ini sang nasambit nga suspetsado.
Samtang positibo nga gintumod ni Brillo nga ang suspetsado sang mga pila ka mga kinawatay sang motorsiklo sa siyudad ang nakatransaksyon sini matapos nga ginpakita sa iya ang mga kuha sa CCTV.
Natalana naman nga pasakaan sang panumbongon si Brillo nga paglapas sa R.A. 10883 ukon New Anti-Carnapping Law of the Phillippines.
