ROXAS CITY – 19 ka mga punong barangay sa banwa sang Panitan ang gilayon nga ginmanduan nga magpaidalom sa strict-home quarantine.
Ini ang ginkompirmar ni Municipal Health Officer Dr. Rosine Delfin-Avelino sang mainterview sang Bombo Radyo.
Ini matapos nga nakatambong sila sa isa ka sinapol sa Esla-Governor’s Mansion kun sa diin yara ang nag-positibo sa coronavirus disease (COVID-19) nga si Capiz Governor Esteban Evan ‘Nonoy’ Contreras.
Suno kay Avelino nga sa 26 ka mga kabaranggayan sa banwa, 19 ka mga punong barangay ang nagtambong sa nasambit nga sinapol.
Nagtambong man diri ang asawa sang isa ka punong barangay nga isa man ka former barangay captain.
Kalakip sa mga wala nagtambong sa nasambit nga sinapol amo ang punong barangay sang Cabugao, Intampilan, Bahit, Cogon, Tabuc Sur, Agkilo kag Conciencia.
Sa karon suno kay Avelino, 4 na ka mga punong barangay ang napaidalom sa real-time polymerase chain reaction (RT-PCR) test kag may 15 ka iban pa nga nagahulat nga mapaidalom man sa test.
