ROXAS CITY – Ginbawian sang kabuhi ang duha ka driver sang motorsiklo nga nagbungguanay takna 10:24 kagab-i, sa national highway sang Barangay Bolo, Roxas City.
Ginkilala ang mga napatay nga sanday Neil John Dadivas, 27-anyos residente sang Barangay Adlawan kag Bernaldo Duran Jr., 47-anyos residente sang Sitio Jail, Barangay Lawaan, sini nga syudad.
Sandig sa imbestigasyon sang Roxas Component City Police Station, samtang ginasubay ni Dadivas ang dalanon nagikan sa iya puluy-an padulong sa syudad sakay sa Suzuki gixxer nga motorsiklo aksidente ini nga nabungguan sang Honda Wave nga ginamaneho ni Duran.
Ginaalegar nagpang-agaw sang linya si Duran kabangdanan agud bumunggo sa kasugata nga si Dadivas.
Bangud sa impact, lunsay gintabog ang duha ka driver kaupod ang gas tank sang Suzuki sa diin nagleak ang gasolina kag nagresulta sa madasig nga pagkalayo sang duha ka mga motorsiklo.
Madasig nagresponde ang Capiz Emergency Response Team kag ginpadangat sa separado nga ospital ang duha apang lunsay wala nakasalbar sa kamatayon.
