ROXAS CITY – Arestado ang duha ka lalaki sa ginpatigayon nga drug-buybust operation sang Station Drug Enforcement Team (SDET) sa Malipayon Village, Barangay Tiza, Roxas City.
Ginkilala ang mga nagkaladakpan nga sanday, Aldren Dela Cruz, 32-anyos kag residente sang nasambit nga lugar kag Jemmer Asignacion, 35-anyos kag residente naman sang Barangay I, sining syudad.
Sa impormasyon nga nakuha sang Bombo Radyo sa lugar, tatlo kuntani ka mga persona ang dalakpon apang nakapalagyo ang isa nga ginkilala kay John Martin Legaspi kung sa diin ginatudlo subject person sa amu nga operasyon.
Mahibaluan nga nataban ni Legaspi ang buybust money nga P5,000.00.
Narekober sang mga otoridad ang tatlo ka sachets sang suspected shabu, nga ginabulubanta may kabug-aton nga 5 gramos kag may Standard Drug Price nga P49,000.00, kag isa ka sling bag nga naga-duag itom.
Sa karon yara na sa kustodiya sang Roxas City Police Station ang nagkaladakpan para sa nagakaigo nga disposisyon.
