ROXAS CITY – Dakup sa ginpatigayon nga hot pursuit operation sang Pontevedra MPS, ang duha ka mga menor de edad matapos ginsulod kag ginkawatan ang isa ka establisyemento sa Barangay Poblacion banwa sang Pontevedra.
Sandig sa imbestigasyon sang Pontevedra MPS, natukiban na lamang sang tag-iya nga ginsulod sang makawat ang iya establisyemento takna 7:00 sang aga.
Ba-se sa kuha sang CCTV footage, antes magsarado ang merkado, nakapanago na ang duha ka mga suspek sa cabinet, sang masiguro nga wala na sang tawo, natigayon sang mga ini nga mabuksan ang cash registry kag nakuha ang P4000 nga cash, nanari-sari nga mga grocery items, sigarilyo kag sabon nga nagabalor sang kapin P2,000.
Nadakpan ang duha ka mga suspek sa Brgy. Malag-it sa amu nga banwa.
Desidido naman nga magpasaka sang nagakaigo nga panumbungon ang tag-iya sang establisyemento.
Sa karon, yara na na ang mga ini sa paghinakup sang kapulisan kag natalana nga iga-turnover sa kustodiya sang Department of Social Welfare and Development (DSWD).
