ROXAS CITY – Kalakip ang duha ka mga Authorized Persons Outside Residence (APOR) sa dugang nga nag-positibo sa coronavirus disease (COVID-19) sa probinsiya sang Capiz.
Ini amo ang 23 anyos nga call center agent nga babaye nga residente sang Barangay Nasunugan, Dao, Capiz nga may history of travel sa sulod sang Western Visayas.
Kag ang 31 anyos nga lalaki nga taga-Barangay Inzo Arnaldo, Roxas City nga may history of travel sa sulod sang man sang rehiyon.
Sa pagpakig-angut sang Bombo Radyo kay Dr. Humble Horneja, Municipal Health Officer sang banwa sang Dao, ginpahayag sini nga ang babaye nga nagpositibo sa amo nga banwa ang isa ka call center agent sa BPO company nga iQor.
Una ini nga nagpauli sadtong Agosto 6 matapos ginpaidalom sa real-time polymerase chain reaction (RT-PCR) test sa Iloilo bangud sa una nga narekord nga kaso sang amo nga sakit sa iya ginatrabahuan.
Agosto 8 sang nagguwa ang resulta nga positibo ini rason nga gilayon siya nga ginkuha sa ila balay kag gindala sa Temporary Treatment and Monitoring Facility sang banwa para sa pagpaidalom sa facility quarantine.
Ginapahayag nga asymptomatic ang nasambit nga babaye ukon wala nakitaan sang anuman nga sintomas.
Samtang, naga-trabaho man sa Iloilo City ang lalaki nga nagpositibo sa Iloilo City.
Nahibaluan nga apisar residente sang siyudad ang bag-o nga nagpositibo, didto ini nagatenir sa Iloilo City bangud sa iya trabaho.
Wala ini makapauli sa Roxas City kag didto man sa Iloilo nagpaidalom sa real-time polymerase chain reaction (RT-PCR) test kag subong didto man naka-quarantine.
